黃劍文 、葉巧琳 、鄭俊弘 同 陳凱彤 主演嘅音樂劇載譽歸來，頭場演出當晚吸引眾多圈中好友支持，包括中聲家族嘅黃博、劉威煌、林思彤以及胡渭康等都有嚟撐場。
劍文再度演出音樂劇，心情興奮又緊張，演出嘅歌舞比之前更熟練，同演員之間亦有一定默契，期待將演出帶到觀眾眼前。Fred都有同樣想法，因為大家近月一齊努力排練，好想將團隊嘅努力公諸同好。今次劇團加入咗戲劇導師譚偉權，佢大讚劍文同Fred嘅表現，而比起去年兩人嘅狀態，譚偉權激讚兩位進化成肌肉型男，劍文笑言自己去年演出時太單薄，經過一年嘅操練先變成爆肌身材，所以啲戲服完全唔啱著要修改。
而Fred則表示一星期會操肌三次，除了為健康及體態，主要是為患有天使綜合症嘅兒子Asher，因為阿仔仲未識行，Fred平日要親手抱住兒子，照顧起居飲食及出行，所以佢希望自己有足夠力量湊仔，更加要勤力操練。
另外，葉巧琳喺音樂劇中會與劍文有感情線，佢自揭今次佢哋會比上一次更甜蜜，展現出濃厚嘅愛。