早前成為寵物美容師嘅 馬貫東 ，不時會上傳佢為藝人好友嘅寵物沖涼嘅片段到社交平台，佘詩曼、陳煒、郭晉安、張曦雯、周嘉洛等都係佢嘅客戶。而嚟到2026年，馬貫東就開心分享一個好消息，就係佢有份投資嘅寵物美容學校正式喺珠海開業喇！
馬貫東於18號上載學校嘅開業片段，除咗同大家介紹呢間寵物美容學校外，仲為學校進行「開缸儀式」，親自操刀為一隻黑色嘅貓貓沖涼，片中所見馬貫東相當溫柔咁幫貓貓清洗毛髮，而主子則相當享受對方嘅服務。
除咗主持「開缸儀式」外，馬貫東亦盡責地為佢嘅寵物美容學校招生，佢喺帖文中寫道：「2026年第一個好消息。珠海寵物美容學校開業，學校提供寵物美容師，訓犬師，寵物護理員，初、中，高級國家認可證書課程。」
