演奸角演到攞埋「最受歡迎奸角」獎嘅林嘉華，作客《星光路上》，與主播 潘盈慧 分享點解由一身正氣嘅嘉華哥，變成大家都認可嘅奸角專業戶。
入行前當差嘅嘉華哥，坦言當初冇諗過會成為演員，佢話當年受訓時有機會擔任「少年警訊」主持，正正係呢個工作，成為佢之後投身演藝圈嘅原因。
喺娛樂圈工作超過半世紀，嘉華哥嘗試過唔同崗位，由主持到演員，佢都有唔同心得，例如當年為《體育世界》擔任主持，嘉華哥話好多時都係要自己搵資料，當然仲要夠八卦，識得佢發掘好多鏡頭以外嘅事物，再喺鏡頭前同觀眾分享。
至於演員之路，嘉華哥就話自己初入行時咩都唔識，好在遇到好多大前輩，而自己遇到唔識嘅嘢時亦會不恥下問，嘉華哥仲分享咗 蝦叔關海山 傳授畀佢嘅演戲心得。
雖然嘉華哥謙虛咁話自己嘅演技唔係好，但唔知由幾時開始，佢就變成觀眾眼中嘅「奸角專業戶」，嘉華哥表示走上反派之路嘅原因，都係同當年劇種有關，佢指自己正式演反派嘅劇集係《新紥師兄1988》， 劇中佢由一個黑社會混混做到龍頭大佬，受到唔少觀眾關注，對此嘉華哥話能夠有一個角色可以畀觀眾所記得，係一件幸福開心嘅事。
視演員為終身職業嘅嘉華哥，直言好鍾意演戲，因為每一次演出都可以令佢不斷思考，即使演同類型角色，佢都希望有分別。
問到嘉華哥係咪好似愛演戲一樣咁愛太太，佢就鬼馬咁話：「唔使問喇下話？要問㗎咩？」佢仲話自己成日都以行動嚟表白愛意，但講講下同太太嘅感情，嘉華哥就扯到去好多劇集入面成日會出現一句：「肚唔肚餓呀？煮個麵你食。」佢仲搞笑咁反問：「乜你屋企淨係得麵咩？」想知點解嘉華哥會扯到去煮麵呢個話題？大家即刻睇片啦！
