新劇《非常檢控觀》正式同大家見面，呢日主演 馬德鐘 陳煒 吳偉豪 游嘉欣 賴慰玲 張馳豪 何廣沛 陳曉華 等 齊齊現身造勢，大班Fans都有到場打氣支持偶像。Matthew於劇中扮演韓流偶像，活動上亦即場演唱，一眾拍檔都非常交戲應援，非常有趣，不過狂迷私生飯Hera就突然搞事，令現場非常混亂呀。
現場演唱劇集插曲嘅Matthew，仲話心情非常緊張，要多謝同事安排大字報協助先順利完成咋。而角色患有罕見病症嘅馬神，就指拍攝時要花唔少功夫，仲話連望都唔敢望煒哥，因為對方咄咄迫人，而煒哥就指當中有多年恩怨喇。
Winki劇中不時都會大騷美腿，以短裙短褲上陣，呢日仲即場騷天賦，仲會同Aska發展姊弟戀，佢仲笑指早就求監製加戲，似乎有啲私心喎。
星期二就係游游生日，呢日佢嘅fans就喺現場為佢預祝，令佢非常開心，而佢同Ricco繼《回歸》後再於新劇談情，仲係游游主動倒追，聽佢哋講似乎呢段關係會有唔少笑料咁呀。
《非常檢控觀》星期一至五晚 20:30 翡翠台