45歲方力申（Alex）與葉萱（Maple）去年12月榮升做新手爸媽，努力學習照顧寶貝女兒Isla，前日喺社交平台透露為咗幫寶貝女影靚相，意外拉傷背脊，連「抖氣都痛」無奈缺席比賽。
相中見小方當刻單手抱B、另一隻手舉高用手機影相，點知佢隻手拉得太高，唔小心拉傷背脊，並寫道：「原本一陣間去游水比賽，點知就咁舉高影阿囡，我個背脊就X咗，使唔使咁渣呀，好在張相都影得幾靚」，跟住小方曬出一張背部通紅嘅相，話「拉親手抖氣都痛」，只好留喺屋企享受家庭樂。
影片見Isla側面都好似爸爸，小方面對「餅印」愛女瞬間淪為女兒奴，而作為方家嘅第一粒寶貝孫，Isla出世後集萬千寵愛於一身，爺爺推BB車、嫲嫲緊隨其後一齊散步，兩老全程望住BB車內嘅孫女，流露幸福笑臉。
小方平時忙於工作，自從愛女出世，為咗唔想錯過愛女成長，佢全天候監控囡囡Isla，喺BB床裝cam：「唔喺屋企我都成日𥄫住個女。有聲有畫，影相拍片，仲可以開咪講嘢！」，畫面見方媽細心幫孫女冚被，方家總動員圍繞住小公主氹氹轉，太太葉萱就可以安心修身及調理，佢喺社交平台貼出產後紮肚相！
