修哥生日快樂！1月18號係 胡楓 嘅94歲生日，精靈嘅修哥日前出席一個集團慶祝晚宴時就得到劉德華、周潤發、黃日華、曾志偉、譚詠麟、李克勤等一眾藝人送上大蛋糕同齊唱生日歌賀壽，校長仲話修哥係「最值得尊敬嘅長者」，亦係自己嘅目標。
喺修哥生日當晚，狄波拉、陳友、肥媽、顧紀筠、王祖藍、阮兆祥、李思捷等多位藝人現身晚宴齊為修哥慶祝，席上賓客超過200人。修哥玩得高興時仲上台同一班朋友合唱《朋友》，祖藍更展示「扮嘢」功架變聲用校長唱腔獻唱添！ 近年修哥亦趕上潮流拍片擺社交平台同大家分享生活，所以佢亦同曾孫拍片分享幸福時刻，4位曾孫齊齊向修哥講「Happy Birthday」，氹得修哥好冧！
修哥喺配文就話：「希望新的一年可以給大家帶來更多歡樂！」 唔少網民都留言為修哥送祝福：「我的電子爺爺年年有今日，歲歲有今朝」、「祝楓哥福如東海，壽比南山！年年有今日，歲歲有今朝！」、「恭喜恭喜，依然是那個瀟灑的楓哥」、「楓哥94歲仲咁靚仔咁精神，好掂！」
