黃宗澤（Bosco）踏入新一年攞獎運勁旺，繼攞完雙料視帝後，廣告及商演接job不斷，忙到農曆新年先有得抖，Bosco噚日喺深圳出席一個知名雜誌發起嘅時尚活動，獲頒「年度實力男演員」。
當晚大會以「未來之境」作為活動主題，現場星光熠熠，雲集不少紅星包括關曉彤、李晨、林依晨及朱茵等，而鍾鎮濤與女兒鍾懿更擔任表演嘉賓。
新晉TVB視帝Bosco以黑色閃鑽長拖尾大褸現身紅地氈，展現閃耀時尚感，舉手投足盡顯成熟魅力，立即成為全場亮點，Bosco喺現場貼心為主持人扇風，親和力十足。提到佢今次得到「年度實力演員」，Bosco覺得意義重大：「因為提醒我下一部戲下一個角色，都要比之前做得更好，所以好大壓力。」
陳瀅則奪得「年度潛力演員」，吳業坤與蘇麗珊則獲「年度新人」，各人悉心打扮登上頒獎台。陳瀅以白色閃鑽高义長裙及藍色絲絨露背晚裝亮相紅地氈及頒獎晚宴，展現高貴獨特品味。
陳瀅自從修身成功，著任何款式晚裝都得心應手，對於獲頒「年度潛力演員」，陳瀅得到呢個獎感到非常開心：「對我嚟講係一個好大鼓勵，因為覺得自己一年一年逐步咁進步，希望自己做得更加好，今年將會播出兩套劇，兩個角色都好唔同，同我本人亦好唔同，我用自己潛力去演好呢兩個角色，所以好期待大家見到我努力成果。」
吳業坤與蘇麗珊一同獲頒「年度新人」獎，由內地演員李晨頒獎，坤哥坦言第一次參與內地咁盛大嘅時尚活動，仲可以從李晨手中攞到獎，感覺好開心，雖然入行多年仍可以保持住做新人嘅初心去攞新人獎，尤其係同場跟B哥鍾鎮濤見面，對方山就係佢參加《超級巨聲2》嘅評判，今次能夠以唔同身份相遇，坤哥覺得係好神奇好正嘅一件事。
蘇麗珊好高興得到年度新人獎：「對我嚟講，我喺演員呢條路上永遠都係新人，不斷地學習中，噚晚睇到好多精彩表演，希望日後可以吸收更多藝術養分，走出更時尚嘅個人風格！」