馬德鐘 陳煒 何廣沛 陳曉華 等新劇《非常檢控觀》嘅演員相約食飯睇首播，馬神除咗大開金口獻唱劇集歌曲《黑暗有光》之外，佢仲帶領大家清唱一曲祝賀游嘉欣26歲生日。 游游同 吳偉豪 繼《回歸》後再續前緣演情侶，仲會有游游生擒Ricco嘅戲份，講到呢場床戲，游游就話自己拍嘅時候已經豁出去，而且拍咗幾個唔同角度，所以已經冇晒怕醜感覺。Ricco仲話，同游游已經嘴到麻木晒！
身形高大嘅馬神喺劇中飾演檢控官，行出嚟有型有款，之不過拍住佢演對手戲嘅女拍檔就要努力拉近距離。Winki笑言自己基本上全程都要踩住木箱演戲，而且仲要著住高踭鞋，真係咪話唔辛苦！ 蔣家旻 就話自己最輸蝕，自己對鞋就算已經三、四吋都好難同追近馬神高度呀。
日前Matthew出席劇集宣傳活動時，被Hera突擊仲被對方強行扯衫，仲差啲露點。為免事件重蹈覆轍，Matthew呢晚喺衣著上都唔敢太性感。Matthew仲話因為同Hera太熟，所以知道佢喺活動上肯定會好狼死，所以自己都要黐乳貼打底呀。
《非常檢控觀》星期一至五晚 20:30 翡翠台