平日觀眾見到 宣萱 喺螢幕嘅演出均屬事業型女性，對工作嗰份積極大家都可以感受到，但講到入廚呢方面，宣萱就大方承認自己零分，雖然自己好鍾意食，但煮就絕對唔係佢強項，所以為免做地獄廚神，日常都甚少下廚。
有時睇過好多廚神好似Jamie Oliver嘅節目，都想試吓親自下廚，但一諗到要買、要切食材就放棄。幸好宣萱日常飲食有位好姐姐幫手，令佢不愁好滋味，姐姐更醒目網上自學宣萱鍾意嘅菜色，而且仲煮得好好味。
近日宣萱有份主演嘅電影票房報捷，佢同 古天樂 呢對CP大受歡迎，每次現身宣傳時，宣萱都感染到古仔一齊大派心心、又扮花又飛吻，解鎖以往古仔Cool爆嘅作風。宣萱笑指自己有免死金牌，加上兩人相識太耐，自己30年前後性格一樣，所以令對方輕鬆相對冇太多顧慮。
佢仲坦言唔會理太多，想打佢就會打佢，想推佢出鏡就推。講到票房報捷福利，宣萱大爆會夥古仔同其他演員一齊跳《今期流行》，大家都好期待呢個咁有娛樂性嘅畫面。
