韓國天王 Rain 上月先再次來港出席活動，踏入新一年佢繼續馬不停蹄先後到新加坡同台灣繼續演出，而日前於台北小巨蛋嘅演唱會，當然唔少得大曬佢多年來一樣強勁嘅肌肉，以及充滿力量嘅舞步喇。
途中Rain更走到舞台邊，同唔同區域嘅Fans親切互動，不過期間發現有歌迷肯然冇跟住節奏一齊起舞，仲令佢有啲啲咁多嫌呢幾位Fans唔夠投入熱情。
人有E又有I，有外向當然亦會有怕醜少少啦，而事件過後，呢幾位被點名嘅歌迷，就於社交平台向Rain請罪，而原因就並非因為怕醜，而係佢哋本身係聽障朋友，難以跟上節怕同聽到翻譯嘅即時口語傳譯。呢位朋友仲指演出當晚正係自己生日，被偶像點名已經係最大禮物，仲問大家點向Rain清楚表達當時冇跟跳嘅原因，唔想因為自己而令佢覺得台灣歌迷唔合格呀。
而不時於網上同Fans互動嘅Rain，亦即時被釣出現身，極有誠意咁用中文回覆表達歉意，指自己當時唔夠體貼、考慮不周，補祝對方生日快樂之餘，仲話以後各方面嘅表演，都要更加細心經營。
佢仲補充話雖然無法聽見彼此嘅聲音，亦可能無法了解對方說話嘅含義，但感受到歌迷溫暖嘅眼神。
而呢位壽星收到Rain於社交平台嘅唯一公開回覆，更感激偶像嘅體貼，仲感激一眾網友為佢轉發原Post，更指「Rain嘅舞台魅力就算是聽不懂也想去感受的🤩」，真係令人非常貼心嘅互動呀。
