黃淑蔓 近日推出2026年首支派台歌《喵！》，MV亦同步上架，今次係Feanna首次挑戰執導、剪接同時演出，佢帶住攝影機於上環海味街遊走拍攝貓咪日常，更出動零食慰勞主子，身為愛貓之人嘅Feanna仲覺得非常開心。
以《喵！》作新歌主題當然係因為「貓奴」Feanna家有兩隻愛貓，分別係約5歲嘅Chibi，同約2歲嘅Michi，佢哋過往就經常亮相Feanna嘅社交平台，一齊做運動同練歌：「我好鍾意貓，好想寫一首歌關於貓嘅歌。我鍾意貓嘅態度與世無爭、鍾意做乜就做乜，偶爾有少少調皮。我好想成為一隻貓，所以我將呢個諗法講俾公司同埋填詞人Oscar知，佢就寫咗呢份咁自由自在嘅歌詞。」
首次為自己歌曲MV執導嘅佢又話：「今次係第一次做導演，第一次嘗試用DV機拍攝，其實之前冇乜接觸過，但係我好鍾意佢拍出嚟嘅Vintage畫質。我喺上環海味街拍咗一日，因為嗰度有好多貓，而且每一隻都好得意，全日我就去發掘貓，去搵貓。」
Feanna透露新歌原本還有另一個名字：「填詞人Oscar提議咗另一個歌名《黃淑喵》，我好喜歡，不過反對嘅票數實在太多。唉，大家鍾意啦，咁用《喵！》囉，但私底下我係叫呢首歌做《黃淑喵》！」
雖然Feanna渴望成為一隻貓，但身邊的朋友一致認為佢係「犬系」性格：「『貓系』嘅人比較冷酷、有神秘感同少少高傲、佢哋話我對眼好似貓，但我為人好似狗仔，因為我一見到人就好開心，即刻笑，好似一隻搖尾小狗，所以啲朋友話我屬於『犬系』。」