於劇集《非常檢控觀》中飾演狂迷嘅 陳曉華Hera，唔只撲低扮演韓星嘅 何廣沛Matthew ，佢仲一手拉開對方身上件Deep V西裝褸，搞到Matthew露點人前！
myTV SUPER即時重溫《非常檢控觀》
講到呢集劇情，Matthew就講笑話Hera對佢有非份之想，但係Hera就話自己受夠，仲指對方係老公，呢個反擊嚇到Matthew即時口窒窒，仲大叫話要搵經理人嚟處理呢位狂迷呀。
飾演韓星嘅Matthew既要講韓文仲要唱歌，佢直言都幾大壓力，幸好係拍呢場戲嘅時間係大夜班，商場已經閂咗門，無咁多路人同遊客圍觀，Matthew話如果真係早班拍攝，商場多人嘅話，自己會怕醜。呢場戲動用咗過百演員，Matthew笑言拍攝時可以好好感受下做天王巨星滋味。
另一幕戲就係 游嘉欣 偷咗 徐榮 電話而被 吳偉豪 追捕，兩人揸住電單車風馳電掣，不過劇組對佢哋就相當照顧，即使Ricco有電單車牌都唔使佢親身上陣，高難度動作都交由替身完成。
雖然Ricco只係要補拍大頭、揭頭盔呢啲動作，不過佢話由於自己唔常揸電單車，所以開拍前都有花時間去揸搵返個感覺。而自嘲車牌都未考到嘅游嘉欣，喺劇中就要演一個揸車好叻嘅人，所以笑言自己都有啲心虛，唯有每次坐上車時，都自我催眠自己係揸車好叻嘅人呀。
《非常檢控觀》星期一至五晚 20:30 翡翠台