何超儀 帶埋老公 陳子聰 仲有佢哋旗下演員 Iman Taheri 一齊現身，為佢15年前主演嘅電影國際版舉行首映禮。超儀近年同子聰聯合監製新作，身兼演員嘅超儀雖然貴為何家千金，但都毫不鍚身，親自上陣應付大量動作戲，結果搞到傷痕累累。
佢喺活動上更展示出右手一大截嘅黑色瘀傷，睇見都好嚇人，不過超儀就話唔緊要，今日呢個位置傷，聽日、後日或第日就會第二啲部位，拍動作戲就係咁，而Iman亦遇上同樣情況，視受傷為工作過程之一，但仍然熱愛拍戲。
子聰之前因爲大動脈撕裂情況危急遊走鬼門關，近年雖然漸漸復工，但仍要多次到美國進行手術醫治，情況令人擔心。不過呢日見子聰精神飽滿，更樂觀談身體狀況，佢指自己去年接受過幾次手術，至11月先復工，可以簡單做吓監督工作，希望之後唔需要再入院做手術。
不過老婆超儀就指子聰主動脈上截仲有手尾未完成，遲早都要再入院處理。講到身上嘅疤痕，子聰笑指經過幾次手術累積，駁咗好多傷痕，連住心口到肚臍位，就好似件衫嘅拉鍊長度咁長。