現年38歲嘅糖妹 (黃山怡)愛情路上兜兜轉轉，至今仲未覓得真命天子，若要生兒育女已屬於高齡產婦，佢近日喺網上頻道公開去年去台灣雪卵經過，稱自己要為未來後代買一個保險機會，將生育選擇權握喺自己手上。
糖妹形容此舉有如完成人生大事，喺雪卵過程中，為咗防止卵子喺取卵前自行排掉，糖妹要親自喺肚皮打針，死黨王敏奕亦有出鏡，不僅支持好友決定，更親自落手為糖妹打針，獲讚手勢唔錯一啲都唔痛，兩人喺過程中不時忍唔住笑，最後成功無恙，糖妹事後仲話笑到出晒汗添。
對於雪卵嘅念頭，糖妹坦言經過三至四年深思熟慮，亦有心理掙扎，後來經好友黃美棋引薦下去台灣完成計劃，療程花費約4萬港元(因應不同項目而定)，卵子可以喺當地儲存10年，首年免費，第二年起每年收費約3200港元。
糖妹又指26至35歲係雪卵嘅黃金期，雖然佢已過咗呢個黃金階段，但經過專業測試發現糖妹卵巢庫存量依然優於同齡女性，有信心完成過程。片中見到糖妹喺全身麻醉下，進行約40分鐘取卵手術，最終取出44顆卵子，其中37顆高品質卵子已成熟且可冷凍。
