54歲著名音樂人張佳添因擔任TVB歌唱真人騷《中年好聲音》評審而人氣急升，連其感情世界亦受傳媒關注，去年連環被爆緋聞，先傳張佳添力追TVB高層樂易玲，又揭佢同黃宗澤舊愛甄采浠發展地下情一年，曾被影到搭膊行商場，喺餐廳撐枱腳一杯咖啡兩份飲，張佳添事後否認戀情，形容二人係「膊頭之交」，目前享受單身，強調自己單身8年，永不孤單，張佳添今年被影到同索女喺地鐵傾偈，噚日朝喺社交平台發文澄清，只係「地下鐵碰着friend」，形容呢單新聞係中年爛花生！
張佳添喺社交平台解釋當刻只係喺地鐵遇見一個識咗廿多年，但又多年冇見嘅朋友，大家喺地鐵車廂相遇，感到驚喜而互相問候近況，更踢爆呢張相片係2023年12月影，同時貼出與友人碰面後，互傳短訊嘅內容截圖以作證明，張佳添對於舊相被炒作，話知道相片來源，暗示放料者係一場相識嘅人。
對於報道稱甄采浠係張佳添「女友」，張佳添特別澄清二人關係，稱與甄采浠係互相欣賞及關心嘅好朋友，甚至有過朋友以上、戀人未滿嘅階段，雖然二人曾經有交往過，但肯定從未建立男女朋友關係。
曾自稱「無腳雀仔」嘅張佳添重申係100%單身多年、200%自由奔放，「何須背住任何人做任何事情呢？熟悉添sir的朋友都知道我離婚之後多年，做人態度一直就是『少少風流而不下流』的冇腳雀仔，就連中年好聲音節目裏稱我為『浪子情人』，我好可能下輩子就會這樣自由奔放的渡過，如果有人想企出嚟挑戰我今時今日竟然需要背住任何人才能偷偷摸摸做任何嘢，即管放馬過嚟」。
張佳添亦唔排除日後會遇到真愛，表明自己唔介意「落地」，「有時都覺得個森林雖然又大又有趣好玩，但如果真係能夠搵到一棵茂盛的大樹歇一歇，浪子不再，可能會係更香甜的花生」。
