TVB有唔少高質劇集，每次重播都會再一次引起觀眾追睇，就好似最近喺深夜重播嘅《名媛望族》咁，唔只引嚟觀眾們追睇，江美儀同劉松仁喺劇中嘅對白亦於網上成為熱話，更有網民將佢哋嘅對方製作成貼圖！
立即重溫《名媛望族》
喺《名媛望族》入面有唔少名場面，好似王浩信畀劉松仁怒摑13巴、江美儀黑絲情挑劉松仁、楊茜堯含淚激吻咬實劉松仁嘴唇等，不過近期最受大家熱議嘅，就係江美儀阻止劉松仁娶四姨太嘅一段戲。
劇中江美儀表示自己唔係咁好恰，叫劉松仁唔好妄想娶個戲子嚟做四姨太，當劉松仁壓住怒火講：「Don’t shout at me ! 」江美儀再霸氣回一句：「I don’t give a damn ! I’ll shout as I please ! 」之後又以三房太太嘅身份地位嚟力壓對方：「大姐係書香世代，二姐係前清格格，我阿爸係銀行家！」短短一分鐘嘅對白已經係金句頻出，唔少網民睇完都話畀江美儀嘅對白洗咗腦，唔只有人將對白製作成貼圖，亦有人將呢一段剪輯成鈴聲，更有人讚江美儀呢段對罵，簡直係「大家閨秀式發爛渣」嘅教科書級示範。
