90年代獲封為「玉女接班人」嘅楊采妮自從2013年跟邱韶智拉埋天窗，四年後誕下雙胞胎愛兒後，便一直定居於新加坡，專注照顧家庭及一對現時八歲大嘅孖仔。
Charlie不時分享生活日常，近日佢就喺社交平台紀錄咗閨蜜梁詠琪到訪新加坡，喺佢屋企暫住嘅相片，仲意外令豪宅曝光，Charlie安樂窩裝潢簡潔，非常寛敞。Charlie仲分享小趣事，就係平時喺家中膽小鬼嘅愛犬Faith Faith，見到Gigi 時竟然就好似遇到老朋友一樣，寸步不離成為對方嘅小尾巴，仲不時撒嬌討親親。
見到愛犬活潑可愛樣子，Charlie不禁諗起Faith Faith剛來屋企時嘅樣子，當佢抱住Faith Faith回家，家中另一隻愛犬Snoopy即榮升為姊姊，而姊姊亦好快就愛上呢位妹妹，兼且悉心陪伴妹妹適應新環境。
Charlie又講到呢兩姊妹見證咗自己大肚，到突然家裡多咗兩個小寶寶。從守護喺孩子們睡房門口，到後來守住佢哋玩耍嘅地方。跟住呢兩個寶寶一齊喺地上爬，變成喺屋企跑。看住兩個小 baby，到現在變成兩個巨人，大家形影相隨。Charlie指Faith Faith係聽話嘅小朋友，但又會因為太開心而失控不停吠，不過佢就會喺未被鬧之前，自己走去「naughty corner」罰企，然後露出知錯表情，令人又心疼又好笑。最後Charlie講到愛犬今年要11歲了，但喺媽媽心中永遠都係小 baby。我跟孩子們說一定要珍惜同一對愛犬相處嘅每一天，亦好謝謝佢哋來到我們嘅生命裡。
