衛詩雅與拍拖兩年半嘅醫生男友周祉安（Kenley）去年結婚，衛詩雅事業愛情雙豐收，憑《破地獄》首度獲封影后，原來佢拍緊《破地獄》期間，仲要通宵喺病房照顧另一半，患難見真情，最終拉埋天窗。
周祉安近日接受媒體訪問時，表示自己因一次意外導致肌肉受傷，治療期間不幸出現感染及發炎併發症，引致長期痛症，嚴重嗰陣連走路、坐低都成問題，衛詩雅當時忙於拍《破地獄》，卻衣不解帶咁通宵喺病房守護，只要男友需要入院治療，不論多忙都會堅持陪診，喺周祉安最脆弱嘅抗病時期，衛詩雅成為最重要嘅依靠，令周祉安明白復原路上最需要係踏實嘅陪伴。
周祉安記得有次深夜醒來，睇到衛詩雅好攰瞓喺病房梳化上熟睡，令周祉安第一次真正體會到伴侶係並肩作戰嘅「戰友」。雖然二人職業截然不同，亦抽時間互相陪伴彼此，衛詩雅會邀請周祉安陪對戲，讓另一半用「觀眾角度」給予意見，而周祉安參觀醫學展覽，衛詩雅同樣樂於同行。雖然工作繁重、睡眠不足，之不過佢就學識喺高壓之中，為自己留一點空間，譬如帶愛犬Biru散步、跟太太慢步一段路，佢已經覺得好滿足。
周祉安回想起初讀醫係為咗滿足父母期望，自己本身對文史哲更感興趣，對診症室外嘅世界充滿好奇，反而佢舅父對醫學鑽研近乎係工匠精神，喺醫術與人生抉擇上給予周祉安耐心指導；而佢最難忘係喺多年前喺私家醫院擔任駐院醫生，當時有位伯伯因癌症併發嚴重貧血入院，數月後病重再入院，自知時日無多，特意委託律師寫信，指名希望由周祉安照顧其最後日子，令周祉安明白醫患之間嘅連結，並非單靠藥物，而係靠歲月與真心堆砌而成。
