歌手Tyson Yoshi將於1月首度登陸澳門舉行一連兩場演場會，延續香港騷嘅High爆氣氛，令一眾Fans急不及待跟Tyson再度玩轉招牌「地震」！由於3場香港場嘅嘉賓驚喜連連，網友早於個多月前已競猜是次Tyson澳門騷嘉賓名單！
好友Gareth T.湯令山及「亞洲男神」Jackson Wang王嘉爾率先「被劇透」分別於24及25日擔任嘉賓，期待Tyson與Jackson「兩Son合體」，齊齊「晒胸肌唱情歌」，而大家最期待嘅畫面即將出現，事關Tyson將與Jackson將於尾場首唱新歌《Deadend》，重現千禧年代情歌嘅動聽旋律，勾起現場觀眾滿滿集體回憶。
向來寵粉嘅Tyson準備「尾場限定驚喜」更將打孖上，繼香港尾場後，澳門尾場再度邀得「大佬軒」張敬軒任嘉賓，兩人早前喺社交網站暗示於澳門合體獻唱《By my side》，眼利嘅Fans早已高呼呢個組合「勁Dope」，笑言要著兩條褲過大海。
當Tyson噚日喺社交網站上載與「大佬軒」於香港站合唱《By my side》嘅片段：「25號澳門見！」歌迷反應熱烈，留言區隨即起哄，Tyson就話今次再邀請大佬軒大駕光臨係因上次玩得唔夠喉，雖然大佬軒喺香港尾場已挑戰兩次「插水」，但Tyson自覺可以解鎖大佬軒更多可能。
對於再擔任Tyson演唱會嘉賓，張敬軒留言提醒Tyson ：「今次唱唔該著返件衫，唔好凍親⛄」，張敬軒睇到Tyson上載香港站合唱片段，勾起好多開心回憶，例如玩「插水」時被偷摸，自己開騷都未試過如此益街坊，張敬軒續言：「除咗Tyson唔夠喉外，我都好喜歡跟Tyson歌迷互動，真誠又有趣！」
