中聲家族 周吉佩、 龍婷、 劉洋、 李金凱，仲有 陳展鵬Ruco 同老婆 單文柔Phoebe 、Amanda Strang、郭珮文 、黎諾懿、岑杏賢、鄧麗欣Stephy、楊愛瑾Miki、 何太梁安琪 、 陳百祥夫婦 、 陳浩民夫婦 、 周汶錡 等呢日現身慈善晚宴，當日咁啱係吉吉嘅囝囝正日生日，不過吉吉工作為先，第一年未能同阿仔慶祝生日，雖然有啲內疚，但幸好呢位廿四孝爸爸都準備咗另外一個特備節目補數。
李金凱同劉洋呢對孖寶日前去咗睇偶像張學友演唱會，兩人興奮得喺台下起舞，劉洋睇完騷後依然餘溫未了，呢晚講起件事時，佢更技癢唱返兩嘴。
龍婷喺大灣區進行巡演，今月底去到東莞站開騷，之前佢去宣傳時，一班歌迷專登為佢特製咗星光通道，兩旁都係龍婷嘅相片，令佢好感動。
陳展鵬之前性格比較沉默寡言，近年漸漸破冰多咗表達自己，近日親身喺網上同粉絲互動，佢坦言受老婆及女兒加持，令佢變得樂於同網友或粉絲溝通，仲有感好難得有個途徑俾佢吹吓水。
Stephy同好姊妹Miki一齊現身，兩人保養得宜，Stephy去年獲得樂壇女歌手獎項，新一年佢會繼續擺多啲時間喺音樂方面，仲預告會有新歌推出，同時喺電影、藝術多元化發展。
叻哥早前帶隊出戰踢波時，不慎大腿受傷，幸好無大礙，未有令老婆黃杏秀嚇倒，叻哥更笑言踢波一定有碰撞同損傷，好彩自己後生好快冇事。
