雙料視帝黃宗澤（Bosco）自從與舊愛胡杏兒分手後，就再未有公開承認戀情，近日接受車淑梅主持嘅電台節目訪問，Bosco坦言從未曾對婚姻抱有幻想，即使遇上心儀對象，亦會向對方表明立場。
Bosco覺得遇上心儀對象，應該向另一半表明立場：「我死後，整副身家都可以留畀你，但我唔會結婚。」問到係咪因父母離異而抗拒婚姻，Bosco覺得感恩自己從未因喺單親家庭成長而感到有所缺失，「可能會影響嘅就係我冇幾時結婚、幾時生小朋友呢個家庭畫面，我現時內心根本冇呢個家庭畫面」，至於理想伴侶類型，Bosco希望另一半唔好太黐身、唔要嬌嗲，「一嗲我就想叫救命」。
Bosco喺圈中人緣甚佳，與唔少前輩建立深厚情誼，早前得知「契爺」黎彼得剛離開深切治療部，Bosco便馬上前往探望。當時Bosco笑問：「想食咩，佢起初話想食齋菜，我仲心想佢算乖，懂得要食清淡啲。點知佢突然改口話想食日本魚生。我立即反問『你呢種病可以食刺身嗎？』」雖然黎彼得只係回應「得」一字，但Bosco仍心存疑慮，上網查證後發現刺身屬高風險食物，於是忍唔住回覆對方：「你玩我？想我間接謀殺你？」最後揀咗食白切雞髀，Bosco仲耐心哄對方︰「雞髀免切走皮，揸住成隻食好唔好？」
近年唔少經典劇集被改編為電影，Bosco就希望有朝一日能將《賭場風雲》搬上大銀幕： 「嗰陣我同三哥（苗僑偉）結緣之作，加上澳門景色優美，賭場場景亦別具拍攝特色。」Bosco憶述當年三哥剛復出拍劇，三嫂（戚美珍）經常到場探班送飯，對Bosco照顧有加，自己亦會與兩人傾談心事。Bosco盛讚三嫂既演戲出色，又精於營商。當主持人車淑梅問佢係咪希望搵一位似三嫂咁能幹嘅伴侶，Bosco笑言：「唔使唔使，我自己搞掂得喇！」
Bosco入行27年幕前發展不俗，面對接二連三嘅肯定，Bosco未敢鬆懈：「我要做得更加好。雖然聽落有啲老土，如果表現唔好，又點對得起獎項、對得起觀眾？自己會唔會覺得羞愧？」
Bosco嚟緊亦樂意投資電影製作，為業界貢獻一分力量：「我喺馬來西亞曾經投資電影製作，香港電影業正經歷寒冬，唔少人缺乏工作機會，希望將來能為業界提供一啲機會。我未必好似古天樂咁有份量，但仍希望可以略盡綿力。」
