Tyson Yoshi 一連兩場澳門演唱會星期六晚（24號）開鑼，喺台上演出兼言談永遠唔會令大家失望嘅Tyson先話：「其實香港騷同澳門騷有何分別呢？老實講分別唔大，除咗上次開騷時，我手上冇呢隻戒指！」隨即大晒左手無名指上嘅婚戒，又隔空向太太Christy示愛，閃爆全場！
雖然變成人夫，但Tyson仍然唔吝嗇騷健碩身材，佢半祼上陣以結他自彈自唱《你不會一輩子的愛上我》，之後又話：「我今日『破處』呀！其實我只會彈呢一首，其他歌一概唔識，為咗表演苦練咗數個月。」
Tyson邀請好友 湯令山 見證自己嘅澳門處男騷，Gareth以全黑造型突然「彈」上台，佢哋合唱《December》後，循例展開一番「激情對話」。Gareth率先挑機Tyson唱錯歌詞，Tyson即反擊話「冇辧法，太耐冇唱啦！大家知唔知點解我而家咁少唱呢首歌？因為Gareth今時唔同往日，好難先邀請到佢！」期間有觀眾大叫Gareth除衫，佢立即拒絕，又反問Tyson點解變得「細隻」咗？Tyson解釋：「因為我重睇意大利婚禮嘅片段，自覺太健碩，所以今次刻意跟教練話要『縮水』，令嘉賓可以減輕壓力，所以你而家可以除衫！」嚇到Gareth立即彈開，並強調唔想除衫騷肌，全場觀眾馬上起哄「除衫、除衫」，Tyson見狀即拉開話題，追問Gareth兩年前合唱過嘅歌曲《Less Than Three》到底何時推出，Gareth承諾今年內如願。
演唱會尾聲，Tyson再度升上舞台中央，令全場以為佢將破例encore，點知舞台隨即轉為播放新歌《追 CHASING THE WIND》微電影預告片，畫面一出全場驚喜滿瀉，亦為演唱會首場劃下圓滿句號。
