最近宣佈加盟新公司嘅 周國賢 參與公司嘅「盲盒音樂會」首場演出，今次計劃非常神秘，包括演出嘅歌手同開騷地點都完全保密，但依然吸引過千樂迷報名參加，可惜因場地位置有限，最後只得600名幸運兒入場欣賞。
當日觀眾齊齊「時光倒流」，樂迷迫爆表演場地一間中學禮堂，場面墟冚。音樂一響，台上布幕緩緩拉開，孭住結他嘅Endy一出場就演出經典嘅《目黑》，全場氣氛熱爆。唱完三首歌後同大家打招呼嘅Endy話：「大家好，歡迎大家嚟到盲盒音樂會。好高興今晚可以返去中學年代，感受返青春時、成長時嘅一啲喜怒哀樂。」
佢又自爆讀書時嘅志願：「小學時已經知自己唔係讀書材料，四年班上中文堂寫我的志願，我寫想成為『捉鬼敢死隊』！點知篇文派返嚟，老師喺下面寫：『如果你想成為捉鬼敢死隊，你要先具備以下條件，數學同科學都要滿分。』」Endy坦白話：「結果嗰兩科都肥佬！」令全場即時爆笑。跟住第二年即刻轉軚：「我決定搵返個『踏實』啲嘅夢想，就寫我的志願係想做『聖鬥士星矢』！」令全場再次大笑。
Endy又化身「人生導師」分享感受：「人大個好容易同人比較，有時會覺得人生好似都喺度拆緊一個盲盒。有啲人一打開就已經中咗頭獎，有啲人拆極都拆唔到自己想要嘅嘢。我行得比較慢，有啲舞台，人哋可能一、兩年就上到去，我用咗18年。但慢慢明白，其實人生唔係抽獎，唔使下下都羨慕人。有時拆唔中想要嘅禮物，反而係你生命裏面好寶貴嘅一課。可能呢刻你會覺得好痛苦，點解拆到呢份唔想要嘅嘢，但成長咗好多年之後你諗番轉頭，可能呢份令你痛苦嘅嘢，先至係一份難能可貴嘅禮物，令你變得更加勇敢去成長，走出自己comfort zone。」
Endy呢晚唱足14首歌，除首唱新歌《大個要做個好人》外，又不時走到台邊同Fans近距離接觸，音樂會最後，Endy仲帶領整隊Band落台，與全場樂迷大合照，為特別嘅「盲盒」之夜畫上完美句號。