吳美珩自從2007年公開婚訊嫁入豪門，決定息影專心相夫教子，佢同鄭裕玲、宣萱及顧紀筠等一向好老友，不時一齊聚會，偶爾見到吳美珩近照，吳美珩淡出近廿年風采依然， 佢近日同閨密顧紀筠現身紅館睇張學友尾場演唱會，離場前更見到張家輝，三人即興奮影合照。
吳美珩與張家輝喺1998年喺經典劇《天地豪情》合作，二人飾演兩姊弟，吳美珩演羅嘉良前女友、痴情千金甘鳳欣，而張家輝飾演夠奸夠反骨嘅甘量宏，喺劇中更利用養姊，最終二人反目，當年二人喺《天地豪情》有唔少對手戲，加上佢哋曾喺1999年跨年晚會合唱《愛在心內暖》，可見過往合作留下唔少開心回憶，難怪見番面即熱情相擁！
不少網民大讚53歲吳美珩皮膚依舊白滑，廿幾年冇變仲要繼續咁靚，吳美珩當年參加國際中華小姐競選得到亞軍，其後加入TVB展開演員生涯，吳美珩擁有知性美及古典味道，入行後多次飾演專業人士，曾演處境劇《真情》、《天地豪情》、《妙手仁心III》葉淘、《楊貴妃》梅妃、《楚漢驕雄》虞姬及《九五至尊》女強人Rachel等，更一度獲封「古裝美人」，2006年於《女人唔易做》飾演高志玲，跟林峯譜姊弟戀，2008年播出劇集《太極》成其演藝界告別作。
