草蜢 今年4月將於紅館舉行6場出道40年演唱會，演唱會型爆海報曝光，草蜢預告將為追隨逾40年嘅「元老粉」掀起回憶殺，亦會為GenZ「嫩粉」特設專屬歌單，門票2月4號起信用卡優先訂購、2月10日公開發售。
草蜢日前先剛完成演唱會世界巡演，隨即又為成軍40周年紅館演唱會揭開序幕，早前以華麗造型拍攝演唱會海報，蔡一智（阿智）話：「記得上次影演唱會海報係2022年，眨吓眼上一個演唱會做咗幾年，今日我哋又再靚靚仔仔影全新演唱會海報，時間真係過得好快。」
蘇志威（蘇老闆）就話：「見我哋著到咁閃咁靚，就知道我哋嚟緊4月演唱會有幾咁靚。」阿智揚言影海報只係「頭盤」，開騷嘅服飾同舞台布置將更加華麗。而 蔡一傑（傑仔）仲話：「由早上開始拍咗接近七個小時。我噚晚敷咗幾個mask先至瞓，確保今日好fresh。」
海報拍攝班底陣容強勁合作無間，阿智話：「呢個組合好多年，好有默契。今次最難係我哋三個分開拍攝，互相唔知道對方嘅動作，要估對方做咩動作。」打頭陣嘅傑仔就指：「我要考慮埋佢兩個會點做，手勢動作幅度唔可以遮到佢哋，要靠想像力。」
至於演唱會歌單方面就仍在計劃當中，傑仔話：「我哋做咗40幾年，好多心機血汗，歷年來做過嘅唱片入面，就算精選都好多，真係唔知唱邊啲歌好。」阿智就搶先預告將為GenZ炮製專屬歌單，傑仔續道：「而家大熱Cantopop，我哋嘅歌完全中晒所有朋友嘅心，可以一齊玩，一定非常開心。」阿智笑指：「想體驗『沉浸式港的士高』嘅朋友發達啦，有草蜢陪你！」
而蘇老闆就指：「呢個世界太無常，唔知幾時再有下一次，所以要珍惜今次！」阿智認同：「上次開紅館仲係疫情，觀眾都戴口罩，今年大家可以盡情尖叫，我哋亦可以見到觀眾嘅笑臉，可以一齊大合唱！」