臨近新年， 羅啟豪 繼之前分享面試《中年好聲音》嘅黑歷史片段後，近日又再分享清洗整理同𠝹水仙頭嘅短片，既出人意表又療癒，仲吸引《愛．回家》嘅「大小姐」 林淑敏 等大批圈中人讚好，仲有人出高價向Ramon收購親手炮製嘅靚水仙。而正籌備2月初迷你暗中作樂音樂會嘅Ramon就笑言太忙，可能要明年春節先交到貨喇。
Ramon曾旅居外地多年，早已習慣寓所遍布植物，回港後嘅佢一直希望再過綠色生活，早前就趁年關坐言起行，Ramon話：「我好喜歡植物，的起心肝去買年花，好似風信子、朱頂紅同水仙頭，為家居增添新年氣氛。」
雖然對挑選同處理水仙頭並無經驗，但一向有手工藝天賦嘅佢決定親自動手：「我喺屋企其中一個嗜好就是做手工藝，我參考網上片段，自己𠝹水仙頭，起初以為買到嘅有啲細，但擺設原來效果更好，可以減少盆內空隙，而且生長得又快又健康，過年時就會花開富貴，到時可以再分享成果，向大家送上祝福！」
Ramon將呢次處理水仙嘅短片分享到社交平台，唔止「大小姐」林淑敏留言大表驚喜，《中聲》好友更想佢傳授心得甚至要出高價搶購Ramon親手炮製嘅水仙頭：「𠝹水仙頭只係偷閒放鬆心情，其實近排我要全力籌備2月初舉行嘅音樂會。我會首次挑戰全黑之中演出，呢次音樂會的門票與周邊商品的收益，用以支持幫助視障人士嘅慈善基金會發展，我覺得非常有意義！」
Ramon早前曾專程觀摩黑暗中對話舉辦嘅音樂會，以觀眾身分感受，Ramon表示：「我會盡量選擇讓大家聽得舒服嘅歌曲；最大挑戰一定係記歌詞，現場唔容許任何光線、樂器甚至指示燈，所以亦冇可能有提詞機，所以一定要加倍努力記好歌詞，唔影響觀眾嘅難得體驗！」