相隔7年後再次於香港開騷嘅柏豪話：「真係有啲耐，屋企人、朋友都問幾時巡返香港，終於可以好開心同大家講，今次由香港出發！第一站就係香港！」而公開嘅見面會海報充滿春天氣息，柏豪指：「對男人到40歲呢個年紀，我應該展現唔同嘅一面俾大家，一個新嘅綻放，所以海報都係用綻放為題。」
已巡迴各地近兩年嘅佢又話：「第一站香港當然有好多新構思，之前都去過好多唔同城市，新一次巡迴係自己屋企第一站，內容同制作愈搞愈大，因為係香港做騷限制唔同，好多嘢可以玩，所以我可以肯定歌迷講，今次同上年巡迴好唔同，規模同內容都豐富升級，完全唔會比正規演唱會「少嘢睇、少歌聽」，心思、時間同力氣投入上，我覺得比以前演唱會仲多。」
柏豪直言自己全情投入同導演研究，精心設計好多新環節，而問到會否除衫，插水、吊威吔時？柏豪就笑道： 「我都見到上次Tyson玩插水，如果我跳落台，如果大家肯定接得住我，我唔怕跳㗎…哈哈。吊威吔我都想，成日都想試下台前揈去觀眾席種感覺！」
