「東張女神」 梁敏巧 形象一向貼地，加上早前參與戀綜《女神配對計劃》，令女神形象深入民心。 日前，Maggie北上深圳搭地鐵時被路人偶遇，當時Maggie因為太攰而瞓著，而坐喺佢旁邊嘅乘客認得佢，就即刻拎手機影低呢個時刻放上社交平台同大家分享。
呢位乘客更表示當時心跳加速非常緊張：「有幾下佢瞌到爭啲跌咗過嚟，我個心卜卜跳但發誓我真係咩都冇做過，不過就近睇佢皮膚真係幾好 ～～～」 事後Maggie現身喺該Post下留言，表示：「無計啦前晚11點收工，第二朝5點幾起身去完慈善跑再要去教琴，係攰同眼瞓嘅。」
Maggie更笑言，好彩戴咗口罩，先冇被人睇到自己瞓到流口水。親切嘅Maggie仲喺該Post下面回覆咗唔少留言，不過面對有人作出涉及性騷擾嘅留言：「可以大庭廣眾地揸人麼？可以做到乜先」，Maggie就立即重語氣回覆，向對方正面出撃︰「咁都搵到位性騷擾人呀？尊重下自己同你父母啦！」
