吳若希 戴祖儀 同 丁子朗 一齊出發澳洲拍攝節目《他們的澳洲駕期》，可以寓工作於旅行，三位喺行前已經非常興奮。Jinny笑言覺得係公司覺得佢哋舊年賺太多錢，所以公司想將資源放返喺佢哋身上，所以先會開呢個旅行團。
Joey就覺得公司聆聽觀眾要求，知道大家想睇佢做節目，因為知道丁丁同Jinny同自己友誼深厚，先順便益埋兩位。 Jinny、Joey、丁丁三個老友鬼鬼，不過就未曾一齊去過旅行，只係Jinny同Joey、Jinny同丁丁分別去過，所以佢哋都好期待呢次三人之旅。丁丁更自動請纓可以幫兩位女士搬行李，又話自己真心鍾意搬行李，令Jinny都讚佢好Man，Joey仲話會俾多啲行李丁丁搬。
有Jinny、Joey兩位高分貝人士喺度，未出發已經熱鬧到不得了，Joey仲話有啲喉嚨聲沙啞！而自認係i人嘅丁丁就好擔心自己對耳仔，又自爆曾經坐凌晨機時瞓唔著要搵空姐陪自己傾偈，令Joey、Jinny都反問佢其實係咪想追空姐。
