薛家燕嘅魅力都唔使多講，大家睇吓佢現身商場活動幾受歡迎就知道啦，家燕姐亦好開心同街坊見面，不過佢更加開心就係見到大王安德尊，因為乘機打聽對方係咪好事近，又叫大王帶宋芝齡向佢拜年逗利是，但係對於家燕姐嘅旁敲側擊，大王仍然守口如瓶。
家燕姐鍥而不捨追問同時，仲大爆大王平時係好難約，因為每次約好食飯，最後大王都搵理由爽約，家燕姐懷疑是否跟宋小姐有關，佢又取笑大王拍《流行都市》是寓拍拖於開工。
下個月就係農曆新年，家燕姐每逢過年前工作都忙到冇停手，今年都唔例外，今年會參與內地、大馬同香港嘅春晚演出。不過仔女經已約好佢農曆年去家庭旅行，但地點未定，家燕姐想到國內旅行，如重慶及雲南。當大王提議去哈爾賓時，家姐姐話天氣好凍，仲反擊話唔似你哋成日攬住。
