張與辰 自從參加《中年好聲音3》後人氣急升，擁有大批粉絲，連馬來西亞旅遊促進局都睇中佢嘅高人氣，邀請佢擔任馬來西亞旅遊專員，與辰特登著住馬來西亞傳統服裝出席活動，除咗接過委任狀，仲現場表演拉茶。
見與辰拉得似模似樣，原來佢都係第一次拉茶，仲話原本想試吓轉身，但因為自己着住白色褲，驚會滴到所以放棄，佢仲搞笑話將來可以考慮喺演唱會上表現拉茶。拉完茶之後與辰又親自去到會場外派畀在場等候嘅fans品嚐，實行寵粉無極限。
與辰於2025年事業大豐收，踏入新一年，佢好快又會推出兩首新歌，其中一首係抒情歌，而另一首就會同劉洋合唱，係一首比較有玩味嘅歌曲。與辰話初時都唔知道公司安排咗劉洋同自己合唱，所以好有驚喜，亦都好期待二人到時有機會同台表演會有咩火花。
好快就到農曆新年，與辰預告今年將會留港度歲，屋企人會嚟香港一齊過節。與辰喺香港住咗一段時間，應該好熟悉香港美食，到時應該可以帶屋企人食好西，估唔到與辰竟然話，因為自己太鍾意食燒肉飯同臭豆腐，所以到時屋企人多淨係得呢兩樣嘢可以食喇！
