方媛曬大寶二寶跳舞短片 兩囡遺傳爸爸郭富城天份

天王郭富城同太太方媛（Moka）結婚近九年，先後誕下三位千金，包括長女郭詠希（大寶）、二女郭詠萱（二寶）同去年10月出世嘅細女郭詠心。城城每次受訪時，只要談及愛囡們，就難掩一臉慈父嘅幸福樣。

作為父母，當然希望小朋友遺傳自己嘅優點，貴為舞王嘅城城亦遺傳自己嘅跳舞天份畀囡囡，Moka喺社交平台以「愛跳舞的姐姐和妹妹」為題，分享大寶同二寶嘅跳舞片，兩姊妹分別跟隨音樂節拍舞動，跳得有板有眼，喺鏡頭前完全唔會怯場，非常有自信。兩姊妹除咗遺傳爸爸嘅舞功，仲有遺傳媽咪嘅靚樣。