陳錦鴻演過《創世紀》反派角色許文彪、《刑事偵緝檔案IV》、《萬凰之王》等經典劇集，陳錦鴻與太太杜雯惠於2007年誕下兒子陳駕樺，兒子到3歲半仍未識說話，後嚟驚覺阿仔患有自閉症及中度智障，陳錦鴻決定停工10年專心陪伴照顧兒子，兼花費千萬為阿仔醫病，透過特殊教育及細心陪伴，陳錦鴻近年主力北上登台，亦有喺台上分享湊仔之道！
myTV SUPER《創世紀》
myTV SUPER《刑事偵緝檔案IV》屢破奇案
myTV SUPER《萬凰之王》宣萱獨自坐熱氣球
網民近日喺社交平台上載一條陳錦鴻出席內地商演活動嘅片段，見陳錦鴻一身全白西裝亮相，唱《上海灘》經典歌，59歲陳錦鴻皮膚狀態極佳，一出場已引起在場觀眾哄動，陳錦鴻非常親民咁四圍同觀眾握手。陳錦鴻近年鮮有於幕前露面，2024年出席「Benz雄」許紹雄太太生日派對時，被指暴瘦面黃、頭髮稀疏，令外界擔心其身體狀況，而家睇佢唱歌時中氣十足，完全擺脫過往激瘦憔悴形象，狀態咁fit，相信大家都唔使太擔心！
陳錦鴻於2019年喺廣州買一間大屋，移居廣州生活，陳錦鴻兩公婆近年曾接受劉雅麗網上頻道訪問，分享照顧自閉兒嘅育兒心得。指過去10年停工就好似喺屋企扮演一個角色，每日演緊戲，無論阿仔做錯、表達得唔好或者唔理解都好，陳錦鴻都好有耐性、好好笑容，Keep住情緒去面對阿仔，因為自己唔去扮演角色，就好易俾阿仔影響到情緒或作息。
陳錦鴻為咗幫阿仔融入社會，將來有自理生活，每日會帶阿仔外出，進行唔同活動，譬如爬樹訓練、對人嘅信任，亦會簡介社區面貌等，雖然佢對阿仔講嘢大多數都不被理睬，但佢仍耐心咁堅持每日同講嘢，努力採取「以心教心」陪伴式教育，阿仔精通數學、繪畫，後嚟入讀主流學校，曾考全級第一，又能彈得一手好琴。
呢次陳錦鴻喺內地出騷，除咗熱情回應觀眾，仲喺台上分享湊仔心得，佢坦言而家小朋友壓力好大，想家庭幸福，做父母最重要多講四大金句「我愛你」、「對不起」、「請你原諒我」、「謝謝你」，陳錦鴻覺得小朋友係會感受到愛意。