韓國人氣女團BLACKPINK香港站嘅世界巡迴演唱會吸引咗唔少圈中人朝聖，繼張曼玉、鍾楚紅、陳瀅、陳曉華、陳楨怡、JW王灝兒等入場欣賞後，26號晚嘅尾場，就吸引到淡出娛圈多年嘅靚媽 Ella Koon 官恩娜 到場朝聖。 
Ella喺社交平台分享自己睇騷Vlog，雖然佢以C9自稱，但穿上皮褸熱褲、一身辣妹造型嘅佢，加上臉上零皺紋，十足一個追星少女一樣，難怪唔少網民都留言讚：「呢位C9正過BLACKPINK喎😳」、「睇真啲，佢仲後生過我阿媽三年」、「好心啲後生女唔好扮c9啦」。
喺VIP包廂睇騷嘅Ella，全程都相當hyper，不時會跟住一齊跳，仲跳到連耳環都飛甩埋，不過Ella最後樂極生悲，佢喺限時動態中分享自己嘴唇紅腫嘅照片，並寫道：「睇BLACKPINK睇得太興奮，驚擋住人，踎低一轉身，個口撼咗落個欄杆度」。
