30歲容天佑早前喺TVB劇集《法言人》演見習師爺「Tony仔」形象入屋，去年中秋節宣布求婚成功，去年11月27日擺酒，迎娶拍拖8年嘅圈外女友扶天恩（Winnie），透露婚後已有生B計劃，估唔到咁快就家中有喜！
容天佑今日喺社交平台貼出老婆Winnie孕照，更曬出BB超聲波照，二人開心擺甫士，結婚冇耐嘅容天佑話咁快就升呢做準爸爸，佢開心宣布太太懷孕喜訊：「Coming soon … #今年新年終於唔使比三姑六婆問到口啞啞了！」
按傳統懷孕後三個月先公布喜訊，即係之前佢哋去胡志明市旅行，老婆Winnie已懷孕，容天佑影相時，佢不時輕摸Winnie個肚，全程細心照顧。有網民留言話「難怪突然結婚😂」，容天佑亦親自回覆：「我都等左8年㗎😂」即係由拍拖開始已認定Winnie係結婚對象。
據知容天佑老婆Winnie家世顯赫，家族生意從事珠寶批發商，容天佑曾大方透露Winnie外公做玉、姨姨做翡翠、爸爸做鑽石首飾批發，女家家底不俗！
