吳若希、戴祖儀同丁子朗日前出發到澳洲拍攝全新綜藝節目《他們的澳洲駕期》，連日嚟釋出咗唔少拍攝情況，靚人靚景的確吸引。
丁丁日前出發時就製作咗一條短片，交代佢哋出發情況，不經意寫咗How to survive 10hour flight in economy（如何度過10小時的經濟艙？）當網民期待佢哋嘅講解，畫面一轉就去咗三位喺商務機艙瞓覺嘅情景，寫上Don't fly economy（不要坐經濟艙）。片段惹嚟網民反應兩極，雖然好多人留言羨慕丁丁可以同兩位美女去旅行好幸福，又叫佢enjoy，當中亦夾雜咗一啲言論，話三人有炫富成份，稱坐商務艙懶巴閉，又話佢鄙視經濟艙，因而軒然大波。
丁丁經靜思後，於一個工作完畢嘅晚上，臨瞓前拍片為自己嘅失態誠心道歉，表示雖然片段吸引好多人睇，但佢哋並無炫富嘅出發點同心態，好對唔住引發大家嘅負面情緒，並指佢哋真係冇諗得太細緻同長遠，經一事長一智，自己亦思考「炫富」係咩一回事，覺得真正有錢人係唔係需要炫富，強調片段並無任何價值觀輸出，純係娛樂出發點，「好對唔住打攪到大家」。
好友兼前輩森美見到丁丁誠心道歉，為佢講好說話給予正面評價，話好明白丁丁，又有悔意又有負責任，共勉之。《亞洲超星團》戰友冼靖峰ArchieSin都有留咗個心心給予鼓勵，亦有網民表達了解三人並非炫富，叫佢哋繼續加油。
