容天佑與謝雪心（心姐）日前出席一個寵物節活動，佢哋帶愛犬參賽，現場由專業訓練員教導愛寵接收指令，從而選出最合拍及聽話愛犬，由心姐、練馬師葉楚航及前港姐丘碧瑜擔任評判，結果由容天佑所養嘅3歲大巨型大白熊犬「豬兜」獲得冠軍，豬兜可愛又聽話，難怪深得觀眾及評判喜愛！
心姐今次帶埋義工狗Megan出席，透露年初一將以女財神造型亮相，今次為 《新春保良迎金馬》節目做女財神，近年佢擔任膳心大使，推動老人家食精心製作軟餐，每年節日及過年都跟長者歡聚食流心軟餐，今年就建議心姐擔任財神，心姐亦高興接受。
容天佑剛於去年底與女友扶天恩（Winnie）拉埋天窗，日前佢與太太拍住拖帶愛犬「豬兜」現身，3歲「豬兜」從細養大，愛寵聽到「豬兜」兩字就即刻有反應，所以改咗呢個名，容天佑笑言:「牠一年會甩三次毛，每次甩四個月，因為體形比較大、毛比較長，夏天幾乎是24小時開冷氣，我都受惠長年有得嘆開冷氣。」
容天佑開心透露即將榮升馬年新手爸爸，向大家公佈太太懷孕：「終於可以同大家講這件開心事，自己的身份又會再轉變多一層，要迎接新生命，這段時間要陪太太， 照顧她更多。因為突然間我的身份轉變得太快，就有很多不同的感覺，感謝大家對我的照顧和祝福……我小時候拿不到政府的六千元，希望今年拿到政府的兩萬元資助。」被問有冇送禮物多謝太太，容天佑稱因太開心而忘記咗，幸好被提醒要諗一份有心思禮物，笑言好彩獲指點化解家庭危機。
