《中年好聲音4》70強PK戰來到第二個星期，再有兩位全城關注嘅蒙面歌手登場，分別係白眉鷹王同獅子王，獅子王特別揀咗孫燕姿嘅《天黑黑》，送俾天上嘅太婆。佢話細個好習慣有太婆喺身邊關心，等到有一日失去咗，先知呢份感情有幾珍貴。白眉鷹王就揀咗首當年中學參加學校歌唱比賽攞亞軍嘅歌曲，希望可以得到好成績。
去myTV SUPER重溫《中年好聲音4》精彩賽事
今集再有多位上一回合五燈選手出戰，強強對決，精彩程度爆晒燈，但PK戰要順利勝出，除咗講實力都要講策略，上一round五燈嘅袁帥就深明此道，佢話如果自己有得揀，一定唔會選擇五燈選手PK，因為風險太高，究竟佢個策略能唔能夠令佢順利過關呢？
而另一位上一round五燈選手許美琪，就揀咗陳奕迅難度好高嘅歌《黑夜不再來》，佢話自己日日沖涼都練歌，雖然老公都有俾意見，不過佢就唔會接受啦！
唱自己嘅故事不嬲最能引起共鳴，鄭家聲今次揀咗首慘情歌出戰，原來佢真實嘅情路比歌詞更加坎坷，事關佢有一個遠距離嘅女朋友，分手之後先知原來女方一早已經有咗第二個，唔怪得佢唱到咁痛徹心扉。
