吳文忻（Nathaliie）於2024年8月公開乳癌復發第三期，喺抗癌之路一直積極接受治療，今日有周刊報道稱吳文忻今星期CT電腦斷層掃描報告並唔理想，細胞變異擴散至肝臟，吳文忻身體變虛弱，除夕當晚需要入院輸血，吳文忻受訪時仍樂觀面對，盡力去繼續做，及時行樂。
吳文忻喺報道中透露因食荷爾蒙藥及標靶藥關係影響其情緒，佢選擇先發洩情緒，之後再思考吓因咩事，留意唔好俾負面情緒去主導，靠信仰寄託，不斷鼓勵自己，繼續對抗癌魔，而製作《重生》嗰陣，幕後班底同一時間為佢造咗兩首歌，希望給吳文忻送上希望及動力。
吳文忻早前走進錄音室錄歌，本身諗住有啲舞去配合，佢坦言而家狀態差啲，照CT Scan後發現去咗肝，「肝嗰度好似3cm、胸嗰度已經大到12cm……淋巴嗰啲我自己都望到幾大嚿」，目前一切都繼續盡做。吳文忻於去年12月31號因標靶藥令紅血球、血紅素低，入咗院輸兩包血，今年1月1號就出院，目前標靶藥分量減少，食緊第二個月再睇吓情況，而吳文忻最希望可以運動同排舞郁動吓身體。
