中聲唱將 黃劍文 2025年工作密密麻麻，既出歌又開騷，最近又做音樂劇亦有主持節目，幾乎冇停過。踏入新一年，劍文終於有時間放假去旅行，正在日本度假嘅劍文，開啟Holiday mode，喺社交平台分享吃喝玩樂相。
劍文話自己相隔一年再遊日本，急不及待要品嚐拉麵，「今次已經食咗四個拉麵，一日可以食兩個，一落機食宵夜，都係食拉麵。」
喜愛小動物嘅劍文，仲去到原宿一間水瀨專門店，原來劍文一年前曾經經過呢間專門店，但因為同行朋友有其他行程安排，所以過門不入，今次終於可以零距離咁同水瀨接觸，劍文唔止摸到抱到，水瀨仲爬到佢頭上，完全唔怕人，難怪劍文都話好似圓夢咁開心呀！
冬天去日本好多人都係為滑雪，而劍文此行嘅重點亦都一樣，佢前一晚喺滑雪場酒店浸完個靚溫泉，第二朝食飽飽就出發滑雪。劍文一路滑雪一路揸機自拍，冇返咁上下功架真係分分鐘碌落山呀！
