TVB資深演員許碧姬（碧姬婆婆）日前迎來95歲壽辰，大批網民紛紛送祝福，連視后宣萱亦留言祝「生日快樂」。不少網民關心碧姬婆婆近況，有傳近年深居簡出，有網民早前聲稱碧姬婆婆住喺元朗，外出以輪椅代步。
唔少網民記得當年碧姬婆婆喺《My盛Lady》飾演富婆、《溏心風暴之家好月圓》飾演雲婆婆、《巾幗梟雄》飾演梁四等，碧姬婆婆每次出鏡令觀眾留下深刻印象，角色深入民心，日前適逢碧姬婆婆95歲生日，喺社交平台湧現大量祝賀留言，宣萱曾與碧姬婆婆喺多部TVB劇集《天地豪情》、《賭場風雲》等合作，宣萱一向對前輩敬重。
碧姬婆婆於60歲正式入行做特約演員，婆婆曾喺TVB節目《日日媽媽聲》透露女兒36歲嗰年不幸腦中風，碧姬婆婆即使年紀老邁，仍堅持照顧患病嘅大女，由於大女一向好鍾意睇電視，又好鍾意啲明星，碧姬婆婆為咗令大女開心，就去演一啲小角色，拍劇無論對白多少，碧姬婆婆都去做，一有時間就去照顧大女，後嚟大女離世，碧姬婆婆樂觀面對，同時繼續演不同嘅角色，直至近年淡出幕前深居簡出。
