周杰倫 早前聲勢浩大宣佈參與澳洲網球公開賽，賽前仲聲言要將得到嘅獎金捐出行善，雖然呢位業餘愛好者最後連對手發球都未接到就一秒出局，不過大家都明白呢次係公關性質比真係競爭激烈嘅主要競賽大得多喇。
雖然周董未能晉級，不過就仍然有現身觀戰，仲同另一位同樣沉迷網球多年嘅樂壇老友「香港代表」 陳奕迅 被球迷發現於場邊，觀賞被譽為新一代球王艾卡華斯嘅比賽，同場仲見到周董愛妻 昆凌 ，不過就未見Eason太座 徐濠縈 同行喇。
而Eason亦獲澳網官方邀請，分享佢呢次到墨爾本首次現場欣賞澳網嘅心情，被問到如果有機會希望同邊位網球名將合作雙打時，Eason以流利悅耳嘅牛津腔提到，希望同香港人非常熟悉嘅90年代華裔球手 張德培 合作，形容對方有自己欠缺嘅極高EQ，又以張德培曾為日本職業名將 錦織圭 嘅訓練，認為佢一定係一位好教練。
Eason指自己平時只會以網球做運動，近年大熱嘅Pickleball雖然都有玩吓，不過最愛依然係傳統網球，仲提到自己過往打法係偏各保守嘅防守形球員，不過近年更多機會打波後就日漸進取，更指自己非常鍾意上網搶分咁話，唔知Eason又會唔會好似老友周董咁，來年參加一球定勝負嘅「One Point Slam」表演賽呢？
