肥媽 Maria Cordero向來熱愛下廚，對食材極有要求，佢所住嘅豪宅更擁有一大片私人農地，自然就想種乜都得喇。近日肥媽就喺社交平台分享佢嘅休閒田園生活，大曬農地之餘，仲虛心向網民徵求種植建議。
從片中可見，肥媽置身於一片已經翻好土嘅農地前，興致勃勃向粉絲展示心頭好，又問大家有冇好主意，可以喺呢片地種實用又好食嘅農作物。不過由於農地面積實在太大，驟眼睇好似喺內地嘅清幽郊野，唔少人都以為肥媽喺內地置業退休。
但其實呢個地方係肥媽喺大埔嘅物業，佢多年前就曾種過有機農作物，當時仲惹嚟唔少老鼠，令佢唔敢再種瓜果，又裝多個太陽能驅鳥器保護心血。唔少網民都大讚肥媽好識生活，而且對打理農地嘅事親力親為，相當愛護！
