陳法拉 近年為電影事業頻繁奔波各地，更喺多個電影節現身。佢再次自編自導嘅短片亦將開工：「短片每個部門嘅工作都會參與，包括服裝丶攝影丶道具等等，每日不停開會。今次短片特別嘅地方，就係有英文亦有廣東話，故事內容遲啲再同大家分享，希望盡快可以放映。」
不過佢早前現出席多倫多電影節時，就因為妝容影響被指老態，又唔知係咪太過忙碌而消瘦，有人指佢身穿紅色低胸露背裙驚現「排骨胸」。但之後喺出席澳門國際短片節時，就以一身黑色Tube Dress露肩曬腿反撃，盡顯高貴氣質。
近日又有網民喺美國洛杉磯一間餐廳偶遇法拉，相中可見法拉打扮隨性，以一身藍色不規則剪裁長衫配搭黑褲大方展示身形，更以素顏示人。網民大讚法拉皮膚白滑，非常有少女感，加上法拉喺合照時親切搭住網民，完全展現零架子親和力。唔少網民都留言狂讚法拉保養得宜，完全唔似已經係熟女年紀，凍齡狀態驚艷一眾網民。
