粵劇《新龍門客棧》載譽重演一連三場，喺觀眾掌聲及喝采之下圓滿收官，贏得觀眾口碑，同時徐小鳳、陳美齡、尹飛燕、吳美英、張德蘭、何文匯博士及查小欣等嘉賓專程入場欣賞，陳美齡讚傳統粵劇揉合現代概念感覺雙重享受，小鳳姐亦抽空到場欣賞，二人更入後台探班。
小鳳姐大讚好好睇，各位演員都唱得好，年輕花旦梁非同透露有聽過小鳯姐唱《碧海狂僧》，小鳯姐笑言：「我都學學吓咋！」陳美齡入後台探班：「個個都係獨當一面小生花旦，喺台上都好似競演咁，大家會以最好最拿手功夫一面讓觀眾睇到，同時睇粵劇我第一次睇到AI，所以覺得好新鮮，仲有佈景、燈光好靚。」
開場介紹一眾演員出場，更運用AI人工智能，演員躍動於龍門客棧舞台，讓觀眾一開場已驚喜，重演喺劇情交代更緊湊細膩，武打動作由武術總監韓燕明精心設計，突顯每位文武生及刀馬旦身手，輕功王莫華敏身手敏捷，輕功跳躍令觀眾拍爛手掌，而飾演錦衣衛嘅王志良與梁非同一段夜會，互相試探忠奸，兩人感情交流，令觀眾投入充滿笑聲，梁燕飛演風騷老闆娘，今次盡顯風情，以水袖與廖國森對打一幕，讓觀眾睇得精彩。
劇中飾演奸官郭德嘅符樹旺武功更大放異彩，最後由四大高手李龍、梁兆明、王志良及梁振文聯手以不同武功、武器圍攻夾擊符樹旺，呢幕配上逼真刀光劍影聲效，觀眾睇得肉緊，眾人協助下插中奸官要害而死，儆惡懲奸大快人心。
