吳尊 近日同太太 林麗瑩 現身澳洲網球公開賽，仲同網壇傳奇巨星拿度合照，原來兩公婆此行除咗欣賞網球賽，仲順便慶祝拍拖30週年。吳尊喺社交平台貼出30年前舊相，佢同太太外貌青澀，唔少網友大讚吳尊長情專一，話呢段愛情故事堪比偶像劇，但亦有部分網友對吳尊當年隱婚一事依然耿耿於懷。
吳尊貼出多張同太太嘅合照，照片橫跨30年時間，有16歲兩小無猜嘅純情樣，亦有而家老夫老妻嘅幸福樣。吳尊寫到「我們的三十週年，她買了我最愛的按摩椅、我買了一盆盆栽和一束花，今晚是澳網決賽，不是燭光晚餐，她從不打網球到和我一樣迷上網球，還有我們倆的偶像納達爾(拿度)和我們一起度過我們的30週年，30年前，30年後，幸福美滿」。
貼文吸引大批粉絲留言，不過亦有部分網友喝倒彩，事關吳尊同太太1996年拍拖，2004年已經結婚，但吳尊2005年以飛輪海成員出道，當時以單身人設刻意隱瞞已婚身分，仲陸續同合作女星包括Ella、阿Sa等傳出緋聞。
直至2013年吳尊公開承認早於2004年結婚，而且已經育有大女Nei Nei。之後吳尊仲帶埋愛女上內地節目，徹底由單身偶像路線轉行超級奶爸路線。 雖然隱婚一事已經過去十幾年，理應事過境遷，吳尊一家四口而家亦幸福美滿，但仍然有部分當年嘅迷妹無法釋懷，吳尊貼出陳年舊相晒恩愛，即刻觸動佢地嘅神經：「我當時知道你結婚有孩子是何其崩潰」、「在一起三十年，相當於每個喜歡你的粉絲都面對的是一個徹頭徹尾的騙局。」
