「Benz雄」 許紹雄 去年10月底因癌症逝世，其獨生女 許惠菁 （Charmaine）獲不少網民愛錫，喺呢段時間默默給予Charmaine支持，Charmaine近日與好友 何雁詩 （Stephanie）一齊喺網上節目談及近況，兩位喺父母呵護下成長嘅溫室小花，突然面對各自人生大課題，佢哋都互相欣賞對方！
Charmaine去年返港做甜品烘焙顧問，坦言冇諗過年尾打亂咗原本計劃，對於爸爸離開係好難接受，要假裝冇事發生嗰一刻係最難，Charmaine覺得有時係逼住喺短時間去成長，感覺係唔太舒服，如果有得揀係想被照顧，Charmaine未習慣爸爸已經唔喺度，而家承擔住爸爸嘅角色去照顧屋企，佢又哽咽話每日情緒好似坐過山車咁，一時自己係正正常常、一時就想喊崩潰。
Charmaine提到契家姐 佘詩曼 喺訪問講過需要保持專業，唔會帶住情緒去做嘢，所以佢盡量唔好成日留喺屋企，努力工作同見吓啲朋友。Charmaine稱爸爸許紹雄係一個好負責任嘅人，有好多嘢都係爸爸走咗，由其他人口中得知，譬如許紹雄生前喺工作上盡力配合幕後同事度期，唔遲到唔改期，爸爸嘅工作精神就係無形資產，令Charmaine好想掌握與學習，同時感到驕傲。
何雁詩同Charmaine嘅家庭背景幾相似，兩人由細到大都係溫室長大、又係家中獨女，好多屋企嘅嘢唔使理，面對阿仔鄭讚廷（Asher）一歲半時確診患上罕見遺傳病「天使綜合症」，佢覺得要喺新常態去搵快樂，Charmaine亦覺得何雁詩好勁，樂觀面對阿仔嘅病，幫Asher成長，何雁詩話係要學識「煮到埋嚟就食」，點去面對係自己選擇，盡量對自己情緒要寬容，唔好逼自己要有一日係完全開心，應該要時間去順其自然，佢哋仲笑指二人應該喺屋企飲完酒就爆喊一場！