曾創作多首《放不低》等經典流行曲嘅 馮穎琪 醞釀五年終於回歸，推出一手包辦曲詞兼主唱嘅新作《來回》，放下過往鎂光燈下嘅藝術家、音樂監製、經理人同創作人身份，以新歌記錄佢內在嘅成長同進化。
多年來Vicky一直以獨特個人風格，推動本地音樂同藝術文化，雖然於大眾眼中專業且有個性，不過佢驀然發現自己背負着諸多角色，卻甚少回到自己。
Vicky年前重新走入校園修讀碩士學位，之後再到英國深造，獲得Coaching（導引學）資格成為人生導師：「喺學習入面，我重新了解自己鍾意啲乜、我想做咩人、我想做嘅藝術係咩，亦都發現咗自己有好多恐懼，驚人哋唔明白、唔理解。我明白到，原來只要放下一啲執着，坦誠去讓人了解我嘅想法，唔執着於點樣嘅結果，容許所有嘢發生，都可以生成一啲比原來更多、更好嘅可能性。所以無論喺形象、音樂而至我所有創作出嚟嘅嘢，都係用緊呢個基礎，所以Coaching喺呢件事上面，扮演咗好重要嘅角色。」
為與樂迷分享發掘自己嘅過程，Vicky卸下以往形象，以清爽短髮同寬鬆飄逸長裙，拍下全新造型照。而新作《來回》亦棄用既有呈現方式：「佢唔似一個平常有故事性嘅MV，我想大家享受呢首歌嘅同時，面前有一個可以讓佢哋進入思考嘅一個空間，回憶人生走咗邊段路，呢個旅程又有咩值得去回味，亦都可以提醒自己，原來已經成長咗。」
日前Vicky於西九文化區戲曲中心舉辦『非線性對話』之「來來回回聽來回」活動，親身引導樂迷：「呢次係用Coaching嘅引導方式，同大家分享《來回》嘅同時，感受吓自己，好開心睇到大家嘅分享，每個人都好投入。」
Vicky話新歌《來回》只係整個計劃嘅開端：「我會造一隻黑膠碟專輯《覺色》，當中會收錄我呢五年創作嘅音樂，有啲錄咗但未出街嘅。」整個企劃去年5月已開始籌備，喺英國灌錄咗幾首歌，喺阿姆斯特丹拍攝唱片封套，9月就落實喺宜蘭錄《來回》。
預告今年5月3日將舉行個人音樂會嘅佢指，去年年底失聲兩個月而延遲錄音：「而家已經完成晒，預計專輯3、4月會正式預售，啱啱仲推出咗《覺色大盒》早鳥Package畀大家，當中最正嘅應該係...我可以為大家寫歌嘅package，呢個package得一個名額㗎咋，仲有我一對一Coaching嘅選項！當然唔少得有《覺色》音樂會門票、黑膠碟，亦都有專輯封面限量藝術書籤套裝、《來回》襪，同埋由我develop嘅『覺骰』self-care 對話遊戲等。」