正於台北拍攝新片《老子》嘅郭富城，於戲中飾演燒臘店老闆，由於取景店舖貼近民居，故有唔少網民捕獲城城等拍攝時嘅情況。
留有鬍鬚、身穿polo衫、牛仔褲，腳踏白色長筒水靴嘅城城，被影到於燒臘店內叼住牙籤招呼客人，雖然呢個造型中佬味十足，不過加上城城嘅逆天顏值，唔少網民都留語讚佢係最帥燒臘佬，亦有人留言指城城呢身造型，將會係「2026男性最潮流穿搭」。
90年代因為拍攝電單車廣告而喺台灣爆紅嘅城城，今次喺新片中亦有一段佢帶住小演員揸電單車嘅戲份，當日城城喺台北拍攝呢幕時被網民影低擺咗上網，即時勾起大家嘅記憶，仲紛紛考古搵返當年城城嘅廣告照出嚟，讚嘆城城個樣冇咩點變呀。
