陳展鵬 近年熱衷玩社交平台同網民交流，最近喺一篇「陳展鵬害慘了我兒子」嘅潮文亦吸引咗展鵬嘅認真回覆。潮文中指即將考DSE嘅「兒子」沉迷追展鵬嘅所有嘢，展鵬寫長篇留言安慰家長同鼓勵呢位「小鵬友」，仲關注咗呢位「家長」，令唔少網民都大讚展鵬好窩心，亦有人提醒佢唔駛對潮文認真。
近日展鵬又喺社交平台出Post，轉發廿四味成員Brian訪問片。唔識寫中文字嘅Brian最近因為教小朋友做中文功課而崩潰爆粗，片段爆笑，引起網民「考古」搵出更多Brian嘅舊片。呢次令展鵬轉發嘅，就係Brian表示「如果用粗口鬧人就唔啱，但如果係表達情緒係OK0205。」
陳展鵬亦認同呢個觀點，直言：「適合嘅場合適合嘅人群，最重要識得控制自己，呢個係社會責任。絕對認同，這是精髓，幾千年來嘅文化，好好運用我哋其中一種統一嘅語言文化，我哋可以有今時今日，就係因為我哋有獨特嘅文化，唔講粗口唔代表係好人，有太多PK掩飾自己唔講粗口。」
有網民睇完展鵬嘅回覆後，大讚：「鵬勁貼地 已經想做好鵬友」、「鵬 一齊爆粗」、「我是鵬友我驕傲」，仲有人問展鵬可唔可以錄粗口俾大家聽，真係好鬼馬。
